Lansio canolfan frechu newydd er mwyn gwella gofal iechyd ar gyfer trigolion ar draws Gwent

Bydd Canolfan Frechu newydd Bwrdd Iechyd Prifysgol Aneurin Bevan, sydd wedi'i lleoli yng nghanol tref Cwmbrân, yn gwella ac yn cynorthwyo'r gwasanaethau presennol er mwyn caniatáu gwell mynediad i bobl Gwent dderbyn nifer o frechiadau achubol. 

Dywedodd Nicola Prygodzicz, Prif Swyddog Gweithredol y Bwrdd Iechyd, "Mae brechu'n dal i fod yn un o'r mesurau mwyaf effeithiol a hollbwysig i atal afiechydon heintus a chadw ein cymunedau'n ddiogel. Mae lansio ein canolfan frechu newydd yng Nghwmbrân yn nodi cam arwyddocaol ymlaen o ran gwella gwydnwch ein cymuned yn erbyn salwch y gellid ei atal gyda brechlynnau.

Mae'r buddsoddiad hwn yn iechyd y cyhoedd yn ailddatgan ein hymrwymiad i ofal iechyd teg trwy sicrhau bod yr holl drigolion yn cael cyfleoedd hygyrch i dderbyn nifer o frechiadau gwahanol. Yn ogystal, trwy ddarparu gwybodaeth a chymorth dibynadwy gan ein gweithwyr gofal iechyd proffesiynol profiadol, rydym hefyd yn galluogi pobl i wneud penderfyniadau cytbwys a hyderus am eu hiechyd a'u lles eu hunain yn ogystal ag iechyd a lles eu hanwyliaid. Er y bydd y ganolfan yn cynnig gwasanaeth galw heibio, rydym yn gofyn i'n trigolion gadw at unrhyw apwyntiad brechu a allai fod wedi cael ei drefnu ar eu cyfer yn flaenorol."

Bydd y ganolfan newydd, sydd ar agor chwe diwrnod yr wythnos, yn gartref i nifer o nyrsys ac ymarferwyr imiwneiddio profiadol sy'n gallu rhoi ystod eang o frechiadau ar gyfer yr holl grwpiau oedran gan gynnwys; Pigiadau Atgyfnerthu ar gyfer Covid-19, Brechlynnau'r Ffliw, HPV a llawer un arall. Gallant hefyd ateb unrhyw gwestiynau neu bryderon ynghylch brechu. Bydd trigolion hefyd yn gallu gwirio statws eu brechlynnau ac i gael cymorth gydag arweiniad cymhwyster. 

Nid yw gwasanaethau'r ganolfan yn disodli gwasanaethau sydd wedi'u sefydlu eisoes megis meddygfeydd neu fferyllfeydd - mae'n fodd o ategu a hybu darpariaeth leol y brechlynnau gyda'r nod o gadw ein cymunedau'n ddiogel ac yn iach trwy sicrhau bod brechlynnau'n fwy hygyrch ac yn fwy cyfleus i bobl ledled Gwent. 

Mae rhagor o wybodaeth am y ganolfan frechu newydd ar gael yma: https://abuhb.nhs.wales/vaccinations/vaccination-pop-up-clinics