Enwi Meddygfa Bryngwyn yn Feddygfa y Flwyddyn yng Ngwobrau Cymunedol De Cymru

Enwyd Meddygfa Bryngwyn yng Nghasnewydd yn Feddygfa y Flwyddyn yng Ngwobrau Cymunedol De Cymru 2025, a gynhaliwyd yn Rodney Parade ddydd Iau 23 Hydref 2025.

Mae'r gwobrau a drefnir gan y South Wales Argus, ynghyd â'r Western Telegraph a phartneriaid yn arddangos De Cymru a'r bobl sy'n gwneud gwahaniaeth.

Mae'r wobr, a noddir gan South Wales Hearing Health, yn cydnabod ymrwymiad eithriadol Meddygfa Bryngwyn i ofal cleifion, gwasanaeth cwsmeriaid rhagorol a rhagoriaeth sefydliadol. Canmolwyd y practis gan enwebwyr fel "y feddygfa fwyaf croesawgar, cyfeillgar, hygyrch wedi’i rhedeg yn dda," gyda staff yn gyson yn rhoi anghenion cleifion yn gyntaf.

Roedd Meddygfa Bryngwyn yn sefyll allan ymhlith cystadleuwyr cryf, gan gynnwys Canolfan Feddygol Wellspring a Meddygfa Gogledd Celynen, y ddwy ohonynt hefyd wedi'u henwebu am eu gofal tosturiol a'u hymroddiad i'w cymunedau.

Mae Gwobrau Cymunedol De Cymru yn dathlu arwyr tawel mewn 14 categori, o ofal iechyd ac addysg i brosiectau busnes a chymunedol. Mae'r wobr hon yn tynnu sylw at y rôl hanfodol y mae gofal sylfaenol yn ei chwarae wrth gefnogi iechyd a lles trigolion lleol.

Roedd Meddygon Teulu, Rheolwr Practis a staff yn bresennol i dderbyn y wobr, gan fynegi diolchgarwch i gleifion a'r gymuned ehangach am eu cefnogaeth barhaus.

Dywedodd llefarydd ar ran Meddygfa Bryngwyn,

"Mae'r wobr hon yn adlewyrchiad o'r gwaith caled a'r galon y mae ein tîm cyfan yn ei roi i ofalu am ein cleifion bob dydd,

"Mae'n anrhydedd i ni gael ein cydnabod a byddwn yn parhau i ymdrechu i ddarparu'r gofal gorau posibl."

Dywedodd Lloyd Hambridge, Cyfarwyddwr Rhanbarthol Gofal Sylfaenol, Gofal Cymunedol a Gofal Iechyd Parhaus ym Mwrdd Iechyd Prifysgol Aneurin Bevan,

"Rydym yn hynod falch o Feddygfa Bryngwyn ar gael ei henwi'n Feddygfa Meddyg Teulu y Flwyddyn yng Ngwobrau Cymunedol De Cymru. Mae'r gydnabyddiaeth hon yn dyst i'w hymroddiad i ofal cleifion, eu hymrwymiad i ragoriaeth, a'r gwasanaeth tosturiol maen nhw'n ei ddarparu bob dydd. Llongyfarchiadau i'r tîm cyfan ar yr anrhydedd haeddiannol hon."

Roedd y noson yn ddathliad o unigolion a sefydliadau mwyaf ymroddedig De Cymru.