O'r Llethrau i Welyau Haul: Amddiffyn Eich Croen y Gaeaf Hwn

Bwrdd Iechyd Prifysgol Aneurin Bevan yn Atgoffa Pobl am Ddiogelwch yn yr Haul Tra Byddant ar eu Gwyliau yn Ystod y Gaeaf

Wrth i lawer o bobl hedfan i chwilio am yr haul yn ystod misoedd y gaeaf, neu ddianc i eira’r mynyddoedd, mae Bwrdd Iechyd Prifysgol Aneurin Bevan yn atgoffa teithwyr i aros yn wyliadwrus o ran diogelwch yn yr haul, hyd yn oed yn ystod y misoedd oerach.

Er bod gwyliau yn ystod y gaeaf yn teimlo’n wahanol iawn i wyliau dan belydrau cryf yr haf, gall ymbelydredd uwchfioled (UV) beri risg ddifrifol i'ch croen o hyd. Mae lefelau UV yn parhau i fod yn uchel drwy gydol y flwyddyn a gallant fod yn arbennig o gryf mewn cyrchfannau sgïo uchel, lle mae golau haul yn adlewyrchu oddi ar yr eira ac yn cynyddu amlygiad pobl iddynt.

Nid yw Pelydrau UV yn Cymryd Gwyliau

Mae Bernadette Tenorio, Nyrs Glinigol Arweiniol Arbenigol Canser y Croen Macmillan, yn egluro:

“Yn aml, nid yw pobl yn llawn sylweddoli pa mor gryf yw haul y gaeaf, yn enwedig pan maen nhw dramor. Gall eich croen losgi o hyd. Mae amddiffyn eich hun yn hanfodol er mwyn lleihau'r risg o ganser y croen.”

Mae canser y croen yn parhau i fod yn un o'r canserau mwyaf cyffredin yn y DU, ond mae modd atal llawer o achosion gyda chamau syml i leihau amlygiad i UV.

Awgrymiadau Hanfodol ar Ddiogelwch yn yr Haul yn ystod y Gaeaf

Er mwyn eich helpu i gadw'n ddiogel ar eich teithiau, mae'r Bwrdd Iechyd yn argymell:

• Defnyddio eli haul SPF 30+ gyda amddiffyniad UVA 4 seren, rhowch ddigon ymlaen yn rheolaidd
• Defnyddiwch falm gwefusau gydag SPF 15 neu uwch i atal difrod cyffredin a achosir gan yr haul ar y gwefusau
• Gwisgwch sbectol haul sy'n blocio UV er mwyn amddiffyn eich llygaid rhag pelydrau niweidiol
• Gorchuddiwch groen eich pen gyda helmed neu het os ydych chi'n sgïo neu'n eirafyrddio
• Arhoswch yn y cysgod yn ystod yr amseroedd ble mae’r haul ar ei gryfaf, hyd yn oed mewn hinsoddau oerach
• Gwiriwch eich croen yn rheolaidd am fannau geni neu ddarnau o groen newydd neu sy'n newid

Gall eira adlewyrchu hyd at 80% o belydrau UV yn ôl ar y croen, gan wneud offer amddiffynnol yn arbennig o bwysig i’r rheiny sydd wrth eu bodd yn cymryd rhan yn chwaraeon y gaeaf.

Wrth losgi unwaith yn unig yn yr haul, mae hyn yn cynyddu'r risg o ddatblygu canser y croen yn nes ymlaen mewn bywyd. Mae triniaeth canser y croen yng Ngwent wedi codi 79% ers 2019. Mae hynny'n gynnydd enfawr - ac mae modd atal y rhan fwyaf ohono. Gellir osgoi 86% o ganserau croen drwy ddilyn awgrymiadau diogelwch yn yr haul.

“Nid yn yr haf yn unig y mae angen bod yn ddiogel yn yr haul,” ychwanega Bernadette. “Drwy gymryd ychydig o ragofalon syml, gall pobl fwynhau eu gwyliau yn ystod y gaeaf heb beryglu eu croen.”

I gael rhagor o wybodaeth am ddiogelwch yn yr haul a lleihau eich risg o ganser y croen, tudalen ymwybyddiaeth o’r haul.