Meddyg Teulu yn dathlu 50 mlynedd o wasanaeth i'r GIG

Mae meddyg teulu o Gasnewydd sydd wedi ymroi ei yrfa i ofalu am gymunedau lleol yn dathlu carreg filltir ryfeddol yr wythnos hon, gan nodi 50 mlynedd o wasanaeth i'r GIG.

Bydd Dr Ramesh Kumar Sharma yn cwblhau 50 mlynedd o wasanaeth i'r GIG ddiwedd yr wythnos hon, ar ôl treulio pum degawd yn cefnogi cleifion ledled Gwent gyda thrugaredd, ymroddiad a phroffesiynoldeb.

Cymhwysodd Dr Sharma mewn meddygaeth yng Ngholeg Meddygol Patna ym 1974 cyn cofrestru'n llawn i ymarfer yn y DU ym mis Medi 1975. Aeth ymlaen i sefydlu ei hun fel meddyg teulu poblogaidd iawn yng Nghwmbrân, gan redeg ei bractis ei hun ym Meddygfa Fairwater am flynyddoedd lawer a gofalu am genedlaethau o deuluoedd lleol.

Heddiw, mae'n parhau i wasanaethu cleifion yng Nghlinig Sant Paul yng Nghasnewydd, gan barhau i fod yr un mor ymroddedig ag erioed i ofal cleifion.

Drwy gydol ei yrfa, mae Dr Sharma wedi ennill enw da am ei garedigrwydd, ei amynedd a'i ffocws diysgog ar anghenion ei gleifion. Mae cydweithwyr yn ei ddisgrifio fel meddyg teulu sydd bob amser yn cymryd yr amser i wrando, gan sicrhau bod pob claf yn teimlo eu bod yn cael eu clywed, eu parchu a'u cefnogi.

Mae ei ffordd ddigyffro, sy’n rhoi tawelwch meddwl, wedi helpu pobl dirifedi trwy gyfnodau anodd, a dyw ei ymroddiad i feddygaeth ac i'r cymunedau y mae'n eu gwasanaethu erioed wedi pylu.

I Dr Sharma, mae ymarfer cyffredinol wedi bod yn llawer mwy na phroffesiwn. Mae gofalu am eraill wedi bod wrth wraidd popeth y mae wedi'i wneud drwy gydol ei yrfa, a hyd yn oed ar ôl 50 mlynedd o wasanaeth, mae'n parhau i drin pob claf gyda'r un cynhesrwydd, urddas a pharch sydd wedi diffinio ei fywyd gwaith.

Mae cyrraedd hanner canrif o wasanaeth yn y GIG yn gamp hynod ynddi’i hun. Mae gwneud hynny wrth barhau i weld cleifion a pharhau i fod mor uchel ei barch ymhlith ei gydweithwyr a'r cymunedau y mae'n eu gwasanaethu yn gwneud y garreg filltir hyd yn oed yn fwy arbennig.

Wrth i Dr Sharma nodi 50 mlynedd yn y GIG, mae cydweithwyr, cleifion a ffrindiau'n dod at ei gilydd i ddathlu gyrfa eithriadol ac i ddiolch iddo am ei gyfraniad rhagorol i ofal iechyd yng Ngwent.

Llongyfarchiadau, Dr Sharma, ar y cyflawniad anhygoel hwn a diolch i chi am 50 mlynedd o wasanaeth ymroddedig i gleifion a'r GIG.