Cysgu - Ar gyfer Plant a Phobl Ifanc
Mae cysgu a gorffwys yn bwysig iawn i helpu eich corff a’ch ymennydd – mae cysgu yn helpu eich ymennydd i gofio, yn helpu eich corff i wella a thyfu, mae’n helpu â'ch hwyliau, a hyd yn oed eich system imiwnedd. Yn ystod y nos, bydd eich corff yn rhyddhau cemegau arbennig o'r enw hormonau i'ch helpu â'r holl bethau hyn. Pan fyddwch yn sâl, bydd angen i chi gysgu mwy i helpu eich corff i adfer. Hyd yn oed pan fyddwch yn teimlo'n well, yn aml, bydd angen i chi gysgu ac ymlacio ychydig yn fwy hefyd.
Weithiau, os byddwch yn sâl neu â symptomau corfforol, gall eich trefn gysgu droi “â'i hwyneb i waered” - gallwch deimlo’n flinedig iawn drwy’r amser ac efallai y byddwch yn cysgu yn ystod y dydd, ac yn methu â chysgu yn ystod y nos. Gall y profiad hwn fod yn rhwystredig pan fyddwch yn cychwyn teimlo'n well ond byddwch yn dal yn cael trafferth cysgu yn ystod y nos. Mae'n bwysig gwybod fod hynny'n rhywbeth arferol a all ddigwydd i unrhyw un.
Os bydd gennych symptomau corfforol sy'n para'n hir (pa un ai a gychwynnodd y rhain
wedi salwch ai peidio), weithiau, gall y symptomau hyn effeithio ar eich gallu i gysgu, a gall eich symptomau olygu y bydd yn anodd i chi fynd i gysgu. Gall hyn fod yn eithaf anodd! Dyma rywfaint o gynghorion ac awgrymiadau y gallwch roi cynnig arnynt i helpu i roi trefn ar eich cysgu unwaith eto.
Pethau a all helpu:
- Arferion amser gwely - cynnal cyfres o weithgareddau y byddwch yn eu gwneud bob nos, ar yr un adeg, yn yr un drefn, er enghraifft, brwsio eich dannedd, diffodd eich ffôn neu eich dyfais glyfar, darllen llyfr neu wneud rhywbeth sy'n eich ymlacio, a mynd i mewn i'r gwely. Gall gwneud yr un pethau ar yr un adeg ac yn yr un drefn helpu i "hyfforddi" eich ymennydd i wybod ei bod hi'n amser mynd i gysgu, a gall hynny eich helpu i fynd i gysgu yn gyflymach.
- Codi ar yr un adeg bob dydd - bydd hyn hefyd yn helpu eich ymennydd i ddysgu pryd ddylech fod yn effro a phryd ddylech fod yn cysgu. Mae'n ddefnyddiol iawn hefyd sicrhau y gallwch wneud y pethau hynny'n sy'n bwysig i chi, er enghraifft, mynd i'r ysgol neu weld ffrindiau. Bydd cysgu ychydig yn rhagor yn demtasiwn ar brydiau, ond bydd hynny'n drysu cloc eich corff, a gall hynny ei gwneud hi'n anoddach i chi fynd i gysgu.
- Lle i gysgu yw gwely! Weithiau, bydd yr awydd i orwedd ar y gwely a gwylio'r teledu, pori trwy eich ffôn neu sgwrsio â'ch ffrindiau yn gryf, ond bydd hynny'n ei gwneud hi'n anodd iawn i'ch ymennydd ddysgu fod mynd i'r gwely yn golygu mynd i gysgu. Bydd defnyddio eich gwely i gysgu a dim arall yn golygu bod eich ymennydd yn cysylltu'r gwely â chysgu.
- Amgylchedd da i gysgu ynddo - sicrhewch fod eich ystafell yn dywyll, yn lled oer, yn dawel ac yn gyfforddus. Ceisiwch sicrhau nad oes unrhyw glociau, goleuadau, setiau teledu neu ffonau yn agos atoch chi neu'n eich wynebu chi, oherwydd gall y rhain dynnu eich sylw a bydd hi'n anoddach mynd i gysgu oherwydd hynny. Mae defnyddio teganau meddal neu flancedi clud yn ddull hyfryd i'ch helpu i deimlo'n ddiogel ac wedi ymlacio yn y gwely.
- Dim pendwmpian! Bydd yn anodd peidio â phendwmpian os byddwch yn flinedig iawn yn ystod y dydd, ond rydym yn gwybod fod cysgu am gyfnodau byr yn ystod y dydd yn golygu ei bod yn llawer anoddach cysgu yn ystod y nos. Os bydd yn rhaid i chi gysgu am gyfnod byr yn ystod y dydd, gwnewch hynny cyn 3pm, a pheidiwch â chysgu am fwy na 30 munud.
- Gweithgareddau tawel, digyffro a hamddenol. Mae'n syniad da osgoi gweithgareddau swnllyd neu gyffrous cyn mynd i'r gwely, oherwydd gallant wneud i'ch corff a'ch ymennydd feddwl nad yw hi'n amser gwely. Dewiswch rywbeth dymunol rydych yn ei fwynhau ond sydd ddim yn eich cyffroi, er enghraifft, lliwio, darllen neu wrando ar lyfrau sain.
Ceir llawer iawn rhagor o gynghorion ynghylch sut i gysgu'n dda trwy'r nos ar y gwefannau hyn: