Os nad ydych eisoes wedi darllen am yr hyn y gallwch ei ddisgwyl cyn eich apwyntiad, cliciwch yma.
Ceisiwch gyrraedd ar yr amser a nodir yn eich llythyr apwyntiad. Sylwch nad dyma'r amser y byddwch yn cael eich triniaeth o reidrwydd, ac efallai y byddwch yn yr adran am fore neu brynhawn cyfan yn dibynnu amser eich apwyntiad. Gadewch ddigon o amser i deithio i'ch apwyntiad. Os ydych chi'n rhedeg yn hwyr, cysylltwch â'r uned endosgopi i roi gwybod iddynt.
Mae'n bwysig eich bod yn dod â'r ffurflen ganiatâd felyn gyda chi. Gall fod yn ddefnyddiol dod â bag gyda dillad sbâr gyda chi. Os oes gennych stoma, rydym hefyd yn argymell eich bod yn dod â'ch pecyn arferol o fagiau sbâr a chadachau gyda chi.
Pan fyddwch yn cyrraedd, siaradwch â'r derbynnydd i roi gwybod iddynt eich bod wedi cyrraedd. Byddant yn gofyn i chi eistedd yn yr ystafell aros.
O'r fan honno, byddwch yn cael eich galw gan nyrs a fydd yn mynd â chi i ystafell breifat. Byddant yn gofyn ambell i gwestiwn i chi am eich hanes meddygol, a byddant yn egluro pob cam o’r driniaeth i chi, byddant hefyd yn gofyn am eich dewis o feddyginiaeth ar gyfer y driniaeth os yw hynny’n briodol. Bydd croeso i chi ofyn unrhyw gwestiynau sydd gennych.
Ar gyfer rhai triniaethau, efallai y bydd gofyn i chi newid i mewn i ŵn ysbyty. Bydd y nyrs yn rhoi’r ŵn i chi a bydd yn dangos i chi ble i newid. Ar gyfer y rhan fwyaf o driniaethau gallwch gadw eich dillad isaf ymlaen o dan yr ŵn ysbyty; Os nad yw hyn yn wir, bydd y nyrs yn rhoi gwybod i chi. Efallai y byddwch yn cael cynnig dillad isaf dros dro y gallwch eu defnyddio tra byddwch yn yr adran endosgopi, ond gallwch gadw eich dillad isaf eich hun ymlaen os yw'n well gennych. Os ydych ar eich mislif, gallwch gadw pad neu dampon yn ei le.
Ar gyfer rhai triniaethau, neu os ydych chi'n bwriadu cael tawelydd, bydd angen i'r nyrs osod canwla mewnwythiennol (IV). Defnyddir nodwydd fechan i fewnosod y canwla, ond yna caiff ei thaflu a dim ond tiwb plastig bach sy'n aros yn y wythïen. Golyga hyn eich bod yn dal i allu symud eich braich, ac fel arfer, nid oes angen i chi ei chadw’n syth.
Pan ddaw eich tro chi, bydd y tîm nyrsio yn mynd â chi drwodd i'r ystafell driniaeth. Byddant yn eich cyflwyno i'r staff yn yr ystafell ac yn gofyn i chi gadarnhau eich manylion eto. Efallai y byddwch yn teimlo eich bod yn ailadrodd y wybodaeth hon dro ar ôl tro yn ystod eich arhosiad - mae hyn yn rhan o'n proses ddiogelwch ac yn helpu i leihau camgymeriadau.
Os ydych yn cael colonosgopi neu sigmoidosgopi hyblyg, gofynnir i chi dynnu'ch dillad isaf neu stoma ar y pwynt yma, os nad ydych eisoes wedi gwneud hynny.
Yna bydd y tîm yn gofyn i chi orwedd ar wely a byddant yn cysylltu unrhyw offer monitro sydd ei angen. Fel arfer mae hyn bob amser yn cynnwys monitor bys i wirio eich pwls a'ch lefelau ocsigen a gall gynnwys band i wirio eich pwysedd gwaed a llinellau i’ch brest er mwyn monitro rhythm eich calon. Os ydych chi'n cael tawelydd, efallai y byddwch hefyd yn cael ocsigen trwy diwbiau ocsigen trwynol, neu fasg.
I gael gwybodaeth am driniaethau penodol, gallwch ddod o hyd i daflenni gwybodaeth trwy glicio ar y dolenni ar ein hafan.
I ddarllen am yr hyn i'w ddisgwyl ar ôl eich apwyntiad, cliciwch yma.