Cadeirydd

Daw Andrew Morgan OBE o Aberpennar yng Nghwm Cynon ac mae wedi gwasanaethu fel Cynghorydd Bwrdeistref Sirol ers 2004, gan gynrychioli hen ward Gorllewin Aberpennar a ward bresennol Aberpennar.

Yn 2022, dyfarnwyd OBE iddo yn Anrhydeddau Pen-blwydd y Frenhines am ei record rhagorol o wasanaeth cyhoeddus, yn enwedig yn ystod pandemig COVID-19 a'r llifogydd mawr yn 2020. Ar ran Llywodraeth Leol, ymunodd â Thasglu Tomenni Glo Cymru a'r DU, a gychwynnodd adolygiad o'r ddeddfwriaeth bresennol ac archwiliodd opsiynau ar gyfer ymateb i ddiogelwch tomenni glo yn wyneb newid hinsawdd.

Roedd Andrew gynt yn weithiwr i Gyngor Rhondda Cynon Taf, yn yr adran adeiladu i ddechrau ac yn ddiweddarach mewn rheolaeth, cyn sefyll i gael ei ethol i gynrychioli ei gymuned leol. Mynychodd Goleg Technegol Pontypridd am dair blynedd yn llawn amser a dwy flynedd yn rhan-amser.

Fe'i penodwyd i'r Cabinet yn 2008 a gwasanaethodd fel Aelod Cabinet dros Briffyrdd, Gofal Cwsmeriaid a Chynllunio Argyfwng am bedair blynedd, gan gymryd cyfrifoldeb am Wasanaethau Rheng Flaen yn ddiweddarach. Daeth yn Arweinydd y Cyngor ym mis Mai 2014.

Ddiwedd 2019, etholwyd Andrew yn Arweinydd Cymdeithas Llywodraeth Leol Cymru (CLlLC). Drwy'r rolau hyn, mae Andrew wedi gweithio ac wedi meithrin cysylltiadau helaeth â nifer o asiantaethau'r llywodraeth gan gynnwys GIG Cymru.

Cyn dod yn Arweinydd CLlLC, arweiniodd Andrew drafodaethau ar Fargen Ddinesig Prifddinas-Ranbarth Caerdydd gwerth £1.495bn ac roedd yn allweddol wrth sefydlu'r strwythur gweithredol a swyddogion newydd i arwain y sefydliad.

Mae wedi gwasanaethu fel Sylwedydd ar Fwrdd Trafnidiaeth Cymru, ar ôl cael ei wahodd gan Lywodraeth Cymru i ddarparu persbectif awdurdod lleol a chefnogi gwneud penderfyniadau gwybodus.

Mae Andrew hefyd wedi cadeirio Cynghrair Trafnidiaeth De-ddwyrain Cymru (SEWTA) ac wedi bod yn aelod o Dasglu Blaenau'r Cymoedd.