Bwrdd Iechyd yn Annog Gweithlu'r Dyfodol trwy Groesawu Dysgwyr Coleg Gwent i Ysbytai ardraws Gwent
Yr wythnos hon, bu fyfyrwyr iechyd a gofal cymdeithasol lleol o Goleg Gwent yn cymryd rhan yn rhaglen Cadetiaid Nyrsio’r Coleg Nyrsio Brenhinol (RCN) trwy gwblhau lleoliad gwaith mewn ysbytai yng Ngwent.
Yn cael ei chynnal yn ystod Wythnos Genedlaethol Gyrfaoedd (4ydd-9fed Mawrth 2024), mae’r myfyrwyr wedi bod yn treulio’r wythnos yn archwilio gyrfa mewn iechyd a gofal cymdeithasol drwy ennill profiad ymarferol o weithio mewn lleoliad clinigol fel Cadetiaid Nyrsio’r RCN.
Mae Cynllun Cadetiaid Nyrsio RCN Tywysog Cymru yn bartneriaeth gyda dysgwyr ifanc i ddatblygu sgiliau bywyd a chyflogaeth mewn nyrsio a’r teulu nyrsio.
Gan ddechrau eu hwythnos gyda diwrnod sefydlu i'w croesawi, derbyniodd y Cadetiaid hyfforddiant hanfodol i'w galluogi i ymgymryd â'u lleoliad ward, gan gynnwys dysgu am Werthoedd ac Ymddygiadau'r Bwrdd Iechyd; cymryd rhan mewn rhai ymarferion chwarae rôl i ddatblygu eu sgiliau cyfathrebu a thosturi; hyfforddiant CPR; a chael taith o amgylch Ysbyty Athrofaol y Faenor. Bu'r myfyrwyr hefyd yn clywed gan nyrsys presennol yn trafod eu teithiau gyrfa ledled y Bwrdd Iechyd, yn ogystal â chwrdd â rhai o hoff wirfoddolwyr y Bwrdd Iechyd – Cŵn Therapi – a dysgu am y gwahaniaeth y maent yn ei wneud i gleifion.
Yn dilyn eu cyfnod sefydlu, neilltuwyd lleoliadau i’r myfyrwyr ar wardiau gwahanol ar draws ysbytai Gwent i gael profiad o weithio mewn amgylchedd ysbyty.
Dywedodd Sian Wilson, Uwch Nyrs ar gyfer Addysg Israddedig ym Mwrdd Iechyd Prifysgol Aneurin Bevan:
“Mae gyrfa ym maes gofal iechyd yn werth chweil a gall gynnig nifer o gyfleoedd i ddatblygu yn y dyfodol.
“Mae rhaglen Cadetiaid Nyrsio'r Coleg Nyrsio Brenhinol yn gyfle gwych i'r rhai sy'n gwneud cyrsiau iechyd a gofal cymdeithasol i gael profiad o sut beth yw gweithio mewn amgylchedd ysbyty a meddwl am eu gyrfaoedd nyrsio yn y dyfodol. Byddwn yn annog unrhyw un sy’n cael y cyfle i ddilyn cwrs Cadetiaid Iechyd yr RCN i’w ddilyn, a dod allan i brofi sut brofiad yw hynny yn yr amgylchedd clinigol gyda ni.”
Dywedodd Ruby, myfyriwr Coleg Gwent a Chadet yr RCN:
“Rwy’n gyffrous iawn i fod yn gwneud y profiad hwn gyda Chadetiaid yr RCN. Rwy’n gwybod fy mod eisiau mynd i fyd Bydwreigiaeth neu Bediatreg felly rwy’n gobeithio y bydd y lleoliad hwn yn rhoi’r wybodaeth, y profiad a’r sgiliau i mi allu gwneud y penderfyniad hwn gobeithio.”
Dywedodd Allison Werner, Cydlynydd Cadetiaid Nyrsio’r RCN yng Ngholeg Gwent:
“Mae’r wythnos hon yn gyfle anhygoel i’n myfyrwyr gamu i fyd deinamig Bwrdd Iechyd Prifysgol Aneurin Bevan, fel Cadetiaid Nyrsio’r RCN. Mae pob eiliad yn gyfle i ddysgu, tyfu a siapio eu llwyddiant yn y dyfodol i symud ymlaen fel ein gweithlu yn y dyfodol.”
Dywedodd Clare Cullis, Rheolwr Dysgu a Datblygiad Sefydliadol ym Mwrdd Iechyd Prifysgol Aneurin Bevan:
"Ym Mwrdd Iechyd Prifysgol Aneurin Bevan, gwyddom mai pobl ifanc yw dyfodol ein sefydliad a'r GIG. Ein gwaith ni yw agor y drws i eraill a hoffwn ni feithrin ein gweithlu yn y dyfodol. Profiad gwaith yw un o'r ffyrdd gwerthfawr hynny ac rydym yn gallu cyflwyno ein pobl ifanc i'r ystod eang o yrfaoedd rydym yn eu cynnig fel y Cyflogwr Dewisol yng Ngwent.
"Rydym yn frwdfrydig dros helpu pobl ifanc ac mae wedi bod yn bleser hwyluso ein hail garfan o Gadetiaid Nyrsio a'u hysbrydoli i dyfu a chyflawni pethau gwych. Mae ein partneriaethau gyda Choleg Gwent a Choleg Nyrsio Brenhinol Cymru wedi helpu i wneud y cyfle yn bosibl, a dymunwn y gorau i bob Cadet Nyrsio yn eu gyrfaoedd yn y dyfodol ym maes Iechyd, a gobeithio eu croesawu i Fwrdd Iechyd Prifysgol Aneurin Bevan fel gweithwyr y dyfodol."
I gael gwybod mwy am gymryd rhan mewn profiad gwaith ym Mwrdd Iechyd Prifysgol Aneurin Bevan, ewch i: Profiad Gwaith a Gwirfoddoli - Aneurin Bevan (abuhb-jobs.co.uk) neu anfonwch e-bost at: ABB.WorkExperience@wales.nhs.uk