Canolfan Iechyd a Lles Tredegar wedi'i chymeradwyo gan Lywodraeth Cymru

19eg Mawrth 2021

Mae Llywodraeth Cymru wedi cymeradwyo'r achos busnes llawn ar gyfer datblygiad newydd Canolfan Iechyd a Lles Tredegar.

Mae hyn yn newyddion cyffrous iawn i'r gymuned ac i Fwrdd Iechyd Prifysgol Aneurin Bevan. Mae gwaith galluogi bellach ar y safle a bwriedir i'r gwaith o adeiladu'r cyfleuster newydd ddechrau yng Ngwanwyn 2021. Mae'r Ganolfan yn cael ei hadeiladu ar hen safle Ysbyty Tredegar.

Bydd y Ganolfan Iechyd a Lles yn gartref i ddau Feddygfa Teulu bresennol sy'n gweithio'n annibynnol; Canolfan Iechyd Tredegar a Meddygfa Glan-yr-Afon. Bydd y ganolfan yn dod ag ystod o wasanaethau i gleifion ynghyd mewn un lle, gan gynnwys Fferylliaeth Gymunedol a Deintyddiaeth Gymunedol Gwasanaethau Meddygol Cyffredinol, Gwasanaethau Cymunedol, Gofal Cymdeithasol a Phartneriaid y Trydydd Sector. Mae'r datblygiad hwn yn elfen sylfaenol o'r model Dyfodol Clinigol ym Mwrdeistref Blaenau Gwent, gan helpu'r Bwrdd Iechyd i ddarparu ystod eang o wasanaethau yn agosach i'r cartref i'r gymuned leol.

Bydd Bwrdd Iechyd Prifysgol Aneurin Bevan yn gweithio’n agos gyda thrigolion lleol, ynghyd â sicrhau bod etifeddiaeth hen Ysbyty Tredegar yn cael ei chynrychioli yn yr adeilad newydd.

Dywedodd Judith Paget, Prif Weithredwr Bwrdd Iechyd Prifysgol Aneurin Bevan: “Rydyn ni wrth ein bodd bod Llywodraeth Cymru wedi cymeradwyo Canolfan Iechyd a Lles Tredegar newydd, sy’n enghraifft berffaith o’n huchelgeisiau ar gyfer trawsnewid darpariaeth gofal iechyd ar draws ardal y Bwrdd Iechyd.

“Mae ein rhaglen Dyfodol Clinigol parhaus yn ein hymrwymo i symud gofal yn agosach at gartrefi pobl ac mae’r ganolfan newydd hon yn Nhredegar yn galluogi cleifion i gael mynediad at ystod eang o wasanaethau iechyd a gofal cymdeithasol o dan yr un to yng nghanol eu cymuned eu hunain."

Dywedodd y Gweinidog Iechyd a Gwasanaethau Cymdeithasol, Vaughan Gething: “Bydd ein buddsoddiad o £19m yn helpu i wella mynediad at ystod o wasanaethau gofal iechyd yn agosach at adref i bobl sy'n byw yn Tredegar. Bydd Canolfan Iechyd a Lles Tredegar newydd at y diben yn helpu i sicrhau bod Bwrdd Iechyd Prifysgol Aneurin Bevan yn parhau i gefnogi ei breswylwyr am flynyddoedd i ddod. ”