Partneriaeth Tai ac Iechyd yn Creu Cartrefi Newydd ym Mrynmawr
Mae cynllun tai newydd ar safle hen Glinig Brynmawr ym Mlaenau Gwent wedi agor yn swyddogol.
Mae Tŷ Acer yn adeilad fflatiau newydd sy'n cynnwys pum fflat gyda mannau cymunedol a swyddfeydd ar gyfer preswylwyr a staff.
Wedi’i reoli mewn partneriaeth â’r sefydliad tai di-elw United Welsh a Bwrdd Iechyd Prifysgol Aneurin Bevan fel rhan o’r Prosiect Acorn, mae Tŷ Acer yn darparu cartrefi a chymorth unigol, arbenigol i bobl ddysgu a datblygu’r sgiliau, y profiad a’r hyder i byw'n annibynnol.
Mae’n fodel gwasanaeth cydweithredol unigryw gan y sectorau tai ac iechyd, sy’n rhoi preswylwyr yn y craidd.
Symudodd preswylydd newydd, Molly, i Dŷ Acer ym mis Medi. Dywedodd hi:
“Ers symud i Dŷ Acer, rydw i wedi dysgu gwneud pethau fel sut i dalu biliau a golchi fy nillad fy hun, sydd wedi bod yn wych. Mae staff bob amser yma i fy helpu.
“Mae symud yma wedi fy helpu yn fawr. Rwy'n teimlo y gallaf dyfu i fod yn bwy rydw i wir eisiau bod, ac mae gen i dîm anhygoel o staff y tu ôl i mi i'm cefnogi ar hyd fy nhaith. Mae Tŷ Acer yn golygu llawer i mi.”
Dywedodd Karen Tipple, Cyfarwyddwr Tai a Llesiant Arbenigol yn United Welsh:
“Rydyn ni’n wirioneddol falch o’r gwasanaethau rydyn ni wedi’u creu gyda Bwrdd Iechyd Prifysgol Aneurin Bevan. Mae ein partneriaeth yn fodel unigryw sy’n ein galluogi i siapio gwasanaethau mewn ffordd sy’n creu newid gwirioneddol ac effeithiol i’r trigolion rydym yn eu cefnogi.
“Yn United Welsh, rydym yn cyflawni ein pwrpas craidd o ddarparu cartrefi o ansawdd uchel a chefnogaeth i bobl, tra hefyd yn lleihau cost uchel yr oedi wrth ryddhau cleifion a brofir gan y Bwrdd Iechyd. Bydd y gwasanaeth hefyd yn rhyddhau lleoliadau ysbyty y mae pobl eraill eu hangen.
“Mae Tŷ Acer yn gam mawr ymlaen yn ein partneriaeth ac rydym yn edrych ymlaen at barhau i weld yr effaith gadarnhaol y mae’r prosiect yn ei greu ar fywydau pobl.”
Dywedodd Megan Duffy, Seicolegydd Arweiniol yn Nhŷ Acer o Fwrdd Iechyd Prifysgol Aneurin Bevan:
“Mae Tŷ Acer yn gyfle i weithio’n greadigol i wneud gwahaniaeth gwirioneddol ym mywydau pobl. Gyda’r ffocws ar berthnasoedd a chysylltiadau wrth wraidd y prosiect, rydym yn gobeithio cefnogi’r preswylwyr i adeiladu eu bywydau yn y gymuned.
“Mae gweithio ar y cyd ag United Welsh yn ein caniatáu i wneud penderfyniadau diogel heb fod yn gyfyngol er mwyn caniatáu mwy o gyfleoedd i bobl ddiwallu eu hanghenion mewn ffordd dosturiol. Rydym eisoes yn clywed am newidiadau mawr y mae hyn yn eu creu i’r trigolion ac rydym yn angerddol am barhau â hyn.”
Mae Tŷ Acer yn adeilad fflatiau sydd wedi'i inswleiddio'n fawr ac sy'n defnyddio ynni'n effeithlon. Fe'i gweithgynhyrchwyd gan ddefnyddio strwythurau ffrâm bren gan Celtic Offsite, menter gymdeithasol o fewn Grŵp United Welsh.
Cyflawnwyd y datblygiad mewn partneriaeth ag United Welsh, Bwrdd Iechyd Prifysgol Aneurin Bevan, Cyngor Blaenau Gwent a Llywodraeth Cymru, gan dderbyn cymorth gan Gronfa Rhyddhau Tir a Chronfa Gofal Integredig Llywodraeth Cymru.